繼聖經之後，雖然我睇晒成套金庸小說，因為大多數人都睇過，好似無咩好講咁(不過我都會後補既......)。所以一月個陣睇左呢本書，「男子漢養成班」，原名係《The Way of The Wild Heart》，呢一本唔係教人健身，又或者係一般「如何成為一位成熟男士」既陳腔濫調。我睇完之後覺得本書好「到肉」。
本書舉出左一個新既觀點，成為一個男子漢需要經歷六個階段：
兒子：深深體會到自己是神的寶貝兒子；
牛仔：參與冒險，培養自己成為牛仔或遊俠；
戰士：參與爭戰，受訓成為戰士；
情人：發現純美，喚醒心中的情人；
君王：為著他人的緣故發揮力量，準備成為君王；
哲士：這一生的經驗，成為哲士的智慧錦囊。
哲士同君王既階段，我無咩資格講，我太年輕了！
情人既階段，有點抽象，只有一部份係提及與女性交往，大部份係講如何被造物主既偉大吸引，從而讓上帝醫治你心中的情人。呢個階段需要大家既親身感受，唔可以身教或者言傳。
我特別想講下兒子、牛仔同戰士既階段，首先你要成為一個男子漢，就要問自己一個問題：
「你喜歡你父親身為一個男人的樣子嗎？」
你希望像他那樣嗎？更切身既問題係！他能在你的人生旅途上帶領你，給你男性所需的啟迪嗎？用以下量尺，評估你處於哪個位置：
「我希望像他那樣，他可以做我的榜樣。」
「他是個好人，但不是我心目中的模範。」
「他大部份時候缺席。我不想和他扯上關係。」
「他是個惡人。願神拯救我脫離他的遺傳。」
我諗大部份男士都會選擇第二個答案，一來係「佢始終都係我老豆」，二係「我選擇第三、第四個既話，咁我咪好不孝」。但係我唔同，我諗左好耐，我選擇左第一個選擇「我希望像他那樣，他可以做我的榜樣。」除左佢未係一個基督徒之外，我父親─簡耀國，絕對可以成為我既榜樣。
第一，我其實係好鍾意煮野食既，我好享受由開始預備食材，到完成一道食香味俱全既菜式之間既過程。我會覺得好有成功感，尤其是煮俾一大班親朋好友食，佢地仲會讚你廚藝好。而我父親就係一個好廚藝既人，佢可以晌舗頭(蘇記)到幫個大廚出菜，唔係幫手預備食材喎(呢個係執碼既工作)，而係幫手廚埋。我仲好記得有一年食團年飯，有成大約二十個親戚晌蘇記，由我父親一手煮晒所有野，我仲聽到有位伯父讚我父親「手勢好」，煮得兩味。讚已經唔容易架啦！仲要公開讚。晌個陣我諗：「呢一個係我老豆呀！」我感到自豪，心口都挺得高過人呀！所以晌呢一方面我父親絕對係我既學習對象。
第二，我朋友都知我好鍾意武術。我父親就係習過武既，而家好多人都習武或者玩空手道、跆拳道等等。但係有幾多個人上過擂台，打過比賽，仲要得過獎呢？晌三、四十年前，香港係有擂台打既，係無流派分別既比賽，我父親就參加過，仲得過獎。所以唔好同我講你學過咩，學過物，你有冇上過擂台打過先？冇呀，咁姐係講就天下無敵啦！所以我覺得我父親好勇，佢係我偶像。
第三，我父親可以為左佢老婆既家族生意，而放下自己既工作，去舗頭到幫手。你可以話，男人點可以無左自己既事業架，但係我覺得一個男人既事業就係佢既家庭。一個男人事業幾好都好，但係無左家庭，有屁用！好似我大姐夫咁，原來佢應承左我家姐，4、5年之後佢會舉家回流香港。呢一樣野係我始料未及既。講返我父親，因為佢去左舗頭幫手，所以晌經濟層面上係有著數既，因為呢位員工絕對會忠心同賣力，而且支出都會少0的。另外，我父親都係一個孝順既人，因為咁多年我都係同阿嬤一齊住既，我唔係話其他伯父或叔父唔孝順，只係我覺得晌香港有幾多老人家係住晌老人院呢？孝順唔係講就得架，而係要行動架，唔係每個月俾家用呀，而係關心呀！正因為我父親既關係，我決定左就算係我結婚之後，我都會同我父母親一齊住。
第四，我覺得我係愛子，係因為我終於知點解父母會幫我搵補習老師喇。我以前真係好頑皮，成日俾補習老師打。上面都講到我父親係習武既，如果換成係俾我父親打，個後果我真係唔敢想像。我試過一次，俾我父親踢左一腳，因咩事俾佢踢我就唔講喇，單係個一腳，我已經飛出兩至三米遠，好彩有個坐廁截停左我，如果唔係一定可以飛得更加遠。單憑呢一點我絕對有理由認為，佢係因為知道佢脾氣唔係咁好，唔適合教仔，所以先至送我去補習社。否則，小弟早已遍體鱗傷。
總括而言，我父親絕對係我既榜樣！
講返本書，仲有一個問題係每個男士都會問自己既：「我擁有足以承擔的力量嗎？」有誰人會告訴你：「你有足以承擔結婚的力量了」、「你有足以承擔家庭的力量了」、「你有足以承擔教育子女的力量了」，我想應該沒有吧！正因為沒有人這樣告訴我們，所以我們才會沒有自信，不斷從失敗中建立自信。但係仍然沒有人認同你，你甚至會想：「我至少要得到父親的認同！」，呢本書會解答到你呢個問題。
以上都只係兒子既階段，至於牛仔階段，姐係冒險。如果經濟許可的話，我好希望晌我完成大學學位既時候，進行徒步旅行兩至三個月。同一時間我都覺得我晌美國讀書，都會係一種冒險，因為你需要學會獨立，我就好似幾歲既小朋友咁，剛剛學會說話(說英文)，剛剛學會走路(學駕駛汽車)。甚麼都好新鮮，好好奇。
最後係戰士階段有兩點，第一你需要搵到你既君主。對於我，上帝當然就係我既君主啦！第二，你需要搵到你為咩而戰，例如家庭、第三世界既人、弱勢社群、一個信念、教育、政治等等。但係我仲未搵到，希望我會晌2009年內會搵到。願主指引我的前路。
2009年3月15日星期日
讀書破萬卷 - 男子漢養成班
2009年3月7日星期六
生活有感
過左黎美國三個月，唔知點解好習慣呢到既生活，你話我可以晌到定居，我又唔覺得。美國俾我既感覺雖然係好寫意，但係同時間我又覺得人與人之間既關係好生疏，令到我覺得呢到唔會係我服侍神既地方。我應該會有好大機會返香港發展，但係將來既事邊個知。
講返我住既地方─Albuquerque。呢到高達海拔5000米，搞到我到而家個鼻都仲有血絲。另一方面又好似高原訓練咁，令到我體能大幅下降。好彩大學入面有健身室同室內運動場，可以成日做運動。除此之外，我每日都要6:30起身，行三十分鐘去巴士站，再搭30~45分鐘巴士先至返到學校，真係慘過返工呀！不過，我又好享受每日行個三十分鐘，一黎有時間俾我諗野，二係個段路有好靚既景，俾我感受造物主既偉大。
講下我上既堂CELAC，我竟然會係high-intermediate(高過我家姐一級haha......)，25/3就係中期測驗，不過而家每星期都要交一篇文，作文應該無咩問題，我係vocabulary差0的姐，再加把勁應該問題不大。
最後講下信仰方面，我最近先搵到祟拜返，如果唔係我都唔夠膽貿然寫blog。而我搵到祟拜，我深信都係神既安排。話說兩個星期前既星期四，我搭遲左一班車，當我搭第二班車既時候，我發現坐晌我隔離既哥哥仔睇緊聖經，遲疑左一陣，我就搭訕(我晌到學到既一樣野)，問佢係唔係睇緊聖經(廢話，開場白一句)，跟住打蛇隨棍上，問佢有唔係UNM既學生，同埋邊到有團契/崇拜返。就係咁樣俾我搵到崇拜返，我諗如果我唔係搭遲左一班車(仲要係目送個班車開走)，我都而家都未搵到崇拜返。
2008年12月3日星期三
聽日飛去美國喇
一般人都會晌去外國留學之前搞下farewell party，但係我份人比較低調，同埋唔係咁鍾意做主角，所以無特別搵人食飯。不過，竟然俾我晌最近有意無意咁同一班教會弟兄打波，同舊老細、同事食過飯，同一齊去緬甸短宣既姊妹食飯。最令我覺得出奇既係，竟然可以同一班小學同學BBQ同飲野。
雖然晌以上大部份既活動入面，我都唔係主角，但係我反而更加享受入面個種感覺，我慶幸自己可以成為你既朋友。
見返班小學同學，個感覺好特別，亦都好陌生。小學既記憶大部份只係存在於放學之後補習既階段，印象最深刻既人就係一齊補習既同學，我叫得出名既人真係寥寥可數......不過見返佢地，令到我更加感覺到人生苦短。同我所認識既弟兄姊妹比較，我感覺到佢地因為生活迫人既關係，好似無左活力、朝氣同盼望。而家我可以做既就只係晌禱告中紀念佢地。希望佢地可以認識同埋信靠上帝。
2008年11月26日星期三
讀書破萬卷 - 聖經
呢一本古籍，好難用三言兩語就寫到個簡介出黎，晌坊間到可以買到既書最低限度都會有50~100字既簡介，或者係某某知名人士、某某讀者既極力推薦吸引你去買。
但係反觀聖經既包裝，雖然只係黑色封面，紅色邊。但係佢既內容偏偏就係最多人知。
故勿論，係有人推崇備至、或者係批評挑剔，聖經依然係世上最多翻譯本、最好銷量既一本古籍。
究竟點解聖經會係銷量最好既一本古籍呢？
雖然聖經自出版以來已經有一千多年，但係仍然俾人不斷翻印，係唔係有人寫過極力推薦既文章呢？不過就算有，我都可以大膽咁同個個人講：「根本就唔需要，而且你都唔配。」(當然包括我在內)
因為聖經本身就有一種吸引力。一種無形既吸引力。
曾經有一個見證，有一位囚犯被判死刑，晌獄中既圖書館，佢俾呢本黑色封面既書吸引住，最後佢仲成為基督徒，呢一位就係賣福音字畫既林寶先生。
不過縱然係有好多人知道聖經既內容，但係又有幾多人係「行」出黎既呢？
「知而不行者非知也」
「行」出黎唔容易架，但係我會靠著神，「行」出黎！
【奉贈韋左丞丈二十二韻】‧杜甫
紈絝不餓死，儒冠多誤身。
丈人試靜聽，賤子請具陳：
甫昔少年日，早充觀國賓。
讀書破萬卷，下筆如有神。
賦料揚雄敵，詩看子建親。
李邕求識面，王翰願卜鄰。
自謂頗挺出，立登要路津。
致君堯舜上，再使風俗淳。
此意竟蕭條，行歌非隱淪。
騎驢十三載，旅食京華春。
朝扣富兒門，暮隨肥馬塵。
殘杯與冷炙，到處潛悲辛。
主上頃見徵，欻然欲求伸。
青冥卻垂翅，蹭蹬無縱鱗。
甚愧丈人厚，甚知丈人真。
每於百僚上，猥誦佳句新。
竊效貢公喜，難甘原憲貧。
焉能心怏怏，只是走踆踆？
今欲東入海，即將西去秦。
尚憐終南山，回首清渭濱。
常擬報一飯，況懷辭大臣，
白鷗沒浩蕩，萬里誰能馴？
呢首詩最吸引我既係「讀書破萬卷，下筆如有神。 」呢一句詩，
我好想知道究竟有冇一個人可以晌一生裏面讀到過萬本書？
就算係一日讀一本書都好，最少都要27.4年既時間，
不過我想試下！(漫畫當然係唔計啦！)
蔡李佛散手
學左蔡李佛兩個月，越學得多，興趣就越濃厚。
順叔教左我「連還扣打」裏面既十七式，雖然係套路，但係絕對無減少到佢既實用性。
01.四平標馬，穿手陽插
02.四平標馬，盤橋陰插
03.四平標馬，穿手昂插
04.四平標馬，盤橋平插
05.丁字馬，左哨搥
06.四平馬，右插搥
07.丁字馬，左拋搥
08.四平馬，右插搥
09.丁字馬，左插搥
10.四平標馬，右批肘
11.四平標馬，圈手昂掌
12.丁字標馬，掛哨頂掌
13.四平標馬，盤橋哨搥
14.四平標馬，穿手昂插
15.四平卸馬，盤橋哨搥
16.四平進馬掛搥
17.四平標馬，穿手陽插(循環第一式)
一連6堂既速成班，真係唔係講玩笑鬧著玩呀...
連續不停咁練3、4次都真係幾係野...
可惜時間唔多，如果唔係學晒成套「連還扣打」先走。
