08-03-2008

今日要返教會執短宣既物資
要將四個紅白藍膠袋執滿29kg
之後就傾下緬甸個8日既活動
準備左幾首詩歌、活動等等
原本以為好快就走得可以去練波
點知5點先走得
最後都無去到唯有返屋企做計劃書

今日有個壞消息
團契有姊妹個爸爸過左身，返左天家
雖然我知道「與哀哭的人要同哭」(羅馬書12：15)呢個道理
但係我仲未可以做到
我唯有晌用得著我既地方，盡力去做好...

今日我體會到傳福音既迫切性
當我晌屋企做緊野既時候
突然間有兩個保安扶住爸爸返屋企
我第一次見佢俾阿媽扶住黎行個陣係因為佢飲醉酒
今次我第二次見佢俾人扶住黎行
竟然係因為佢晌花園平台個到跌親
個保安話佢係頭暈同埋兩隻手不停抽筋十隻手指緊握拳頭放鬆唔到
我扶佢坐晌梳化...佢用一隻手晌另一隻手上面不停打圈...
個一刻我唔明佢想點...佢唔講野只係不停打圈...
我個陣成個人慌晒...唔知點好...
之後佢開聲...原來係想我將手指拉開...
過多無耐就扶佢入房(目訓)...
個刻我覺得自己好無能...咩都做唔到...
唯一可以做既就係打電話俾阿媽...同埋祈禱...
生命是何等的虛無縹緲...
由何處來，又往何處去呢？
目的何在，意義何在？
以上既問題係每一個人都唔可以逃避既...
面對死亡，
聰明人係會識得去預備既；但係愚昧人只會識得去逃避。
究竟你係聰明人定係愚昧人呢？