聽日飛去美國喇

一般人都會晌去外國留學之前搞下farewell party，但係我份人比較低調，同埋唔係咁鍾意做主角，所以無特別搵人食飯。不過，竟然俾我晌最近有意無意咁同一班教會弟兄打波，同舊老細、同事食過飯，同一齊去緬甸短宣既姊妹食飯。最令我覺得出奇既係，竟然可以同一班小學同學BBQ同飲野。

雖然晌以上大部份既活動入面，我都唔係主角，但係我反而更加享受入面個種感覺，我慶幸自己可以成為你既朋友。

見返班小學同學，個感覺好特別，亦都好陌生。小學既記憶大部份只係存在於放學之後補習既階段，印象最深刻既人就係一齊補習既同學，我叫得出名既人真係寥寥可數......不過見返佢地，令到我更加感覺到人生苦短。同我所認識既弟兄姊妹比較，我感覺到佢地因為生活迫人既關係，好似無左活力、朝氣同盼望。而家我可以做既就只係晌禱告中紀念佢地。希望佢地可以認識同埋信靠上帝。

讀書破萬卷 - 聖經

呢一本古籍，好難用三言兩語就寫到個簡介出黎，晌坊間到可以買到既書最低限度都會有50~100字既簡介，或者係某某知名人士、某某讀者既極力推薦吸引你去買。

但係反觀聖經既包裝，雖然只係黑色封面，紅色邊。但係佢既內容偏偏就係最多人知。
故勿論，係有人推崇備至、或者係批評挑剔，聖經依然係世上最多翻譯本、最好銷量既一本古籍。

究竟點解聖經會係銷量最好既一本古籍呢？

雖然聖經自出版以來已經有一千多年，但係仍然俾人不斷翻印，係唔係有人寫過極力推薦既文章呢？不過就算有，我都可以大膽咁同個個人講：「根本就唔需要，而且你都唔配。」(當然包括我在內)

因為聖經本身就有一種吸引力。一種無形既吸引力。

曾經有一個見證，有一位囚犯被判死刑，晌獄中既圖書館，佢俾呢本黑色封面既書吸引住，最後佢仲成為基督徒，呢一位就係賣福音字畫既林寶先生。

不過縱然係有好多人知道聖經既內容，但係又有幾多人係「行」出黎既呢？

「知而不行者非知也」
「行」出黎唔容易架，但係我會靠著神，「行」出黎！

【奉贈韋左丞丈二十二韻】‧杜甫

紈絝不餓死，儒冠多誤身。
丈人試靜聽，賤子請具陳：
甫昔少年日，早充觀國賓。
讀書破萬卷，下筆如有神。
賦料揚雄敵，詩看子建親。
李邕求識面，王翰願卜鄰。
自謂頗挺出，立登要路津。
致君堯舜上，再使風俗淳。
此意竟蕭條，行歌非隱淪。
騎驢十三載，旅食京華春。
朝扣富兒門，暮隨肥馬塵。
殘杯與冷炙，到處潛悲辛。
主上頃見徵，欻然欲求伸。
青冥卻垂翅，蹭蹬無縱鱗。
甚愧丈人厚，甚知丈人真。
每於百僚上，猥誦佳句新。
竊效貢公喜，難甘原憲貧。
焉能心怏怏，只是走踆踆？
今欲東入海，即將西去秦。
尚憐終南山，回首清渭濱。
常擬報一飯，況懷辭大臣，
白鷗沒浩蕩，萬里誰能馴？

呢首詩最吸引我既係「讀書破萬卷，下筆如有神。 」呢一句詩，
我好想知道究竟有冇一個人可以晌一生裏面讀到過萬本書？
就算係一日讀一本書都好，最少都要27.4年既時間，
不過我想試下！(漫畫當然係唔計啦！)

日子就由07年1月1日開始！

點解時光倒流？

因為我係唔可以唔去計我讀完成本聖經所需要既時間 ─ 一年零一個月。

而另一方面，我都想聖經成為我呢個計劃既第一本書，

雖然聖經裏面有66卷書，

但係我都會「忍心」咁當佢係一本書架.......................

蔡李佛散手

學左蔡李佛兩個月，越學得多，興趣就越濃厚。
順叔教左我「連還扣打」裏面既十七式，雖然係套路，但係絕對無減少到佢既實用性。

01.四平標馬，穿手陽插
02.四平標馬，盤橋陰插
03.四平標馬，穿手昂插
04.四平標馬，盤橋平插
05.丁字馬，左哨搥
06.四平馬，右插搥
07.丁字馬，左拋搥
08.四平馬，右插搥
09.丁字馬，左插搥
10.四平標馬，右批肘
11.四平標馬，圈手昂掌
12.丁字標馬，掛哨頂掌
13.四平標馬，盤橋哨搥
14.四平標馬，穿手昂插
15.四平卸馬，盤橋哨搥
16.四平進馬掛搥
17.四平標馬，穿手陽插(循環第一式)

一連6堂既速成班，真係唔係講玩笑鬧著玩呀...
連續不停咁練3、4次都真係幾係野...
可惜時間唔多，如果唔係學晒成套「連還扣打」先走。

準備出發

今日落實買12月4日既機票，如無意外就會晌下年11月尾返黎。
暫時黎講，因為簽左5年visa，所以無咩重要野都唔會返香港。
(昂貴既機票係最需要考慮既因素之一)
當然，大前提係讀得掂大學。
希望可以好似奧巴馬既選舉口號咁
YES WE CAN!!

成功簽證

今日第二次去領事館，如果唔係第一次唔記得交錢，都唔使黎第二次，根本可以一次搞掂。

而家要做既係決定幾時過去美國。我自己反而唔想咁快過去，因為我想去多一次短宣先過去，過到美國有成四年時間無得去短宣，講到尾都係因為去過短宣，我先至會決定去美國讀書，我想臨走前去多一次，將個感動再一次深入我個心入面。

12月又會有短宣，18-22號都係去泰國bamboo school。如果時間許可既話，我都想去多一次。

第一堂「蔡李佛」

星期二去左爸爸個師兄弟到學蔡李佛，呢一次先至算係我真真正正第一次學中國功夫，我當然要學蔡李佛先啦！一上到去，當然係學紮馬啦！四平馬、丁字馬，都係爸爸之前講過、同練過既，所以紮左一陣，信叔就教左我基本手法：單手掛哨搥、雙手掛哨搥、雙手掛插搥，同埋轉馬。

做左呢0的基本手法個半鐘到就夠鐘，雖然唔覺得好累，但係好彩我返到屋企無繼續練，如果唔係就慘喇！因為星期三我一起身個陣，左右兩邊既斜方肌都痛到我好似目訓矮頸咁，但係唔係左邊或者右邊，而係兩邊一齊目訓矮頸，搞到我擰左擰右都赤赤痛，到今日都仲痛緊。

其實我都已經預左第二朝會肌肉痛，但就係估唔到斜方肌會痛，而其他地方無事。都唔知會痛到幾時...

Last Day

原本係做到8月既，但係因為未請到人所以就留多兩個月，所以今日係最後一日返工，唔經唔覺就做左兩年幾，或多或少都有0的唔捨得，但係我知如果我唔決定下一步，可能會繼續逃避問題。不過點都好都已經成為過去。

開始步入下一章...
大約10月中就會見美國領事，希望簽到證啦！

What would JESUS do today?

最近睇到一個朋友既日誌，
內容自己睇：
和朋友食飯後被不認識的傳道人"關心"
教會的言論自由- 和朋友食飯後被不認識的傳道人"關心" part 2

睇到最後，我先係愕然，但係心情無任何起伏，只因為我覺得任何人都有犯錯既時候，所以唔覺得有咩特別，我愕然只係因為事件中既人物都係我所認識既。

睇完之後，引證左我對信仰既少少觀點，常言道：做人難！計我話：
做人難，做好人更難，做一個義人(遵守耶和華旨意的人)就最難！
我早排都仲係認為我係一定要返主日學既，但係而家我已經無咁既想法，我唔係話唔會返，只係有選擇咁報讀，唔係人地話你要返呢個主日學，個個主日學就要返既。縱使俾你返晒所有主日學，但係你唔將佢實踐出黎，讀黎有咩用，你讀得再多既主日學都只不過係死讀書、讀死書、讀書死。

「世人哪、耶和華已指示你何為善。他向你所要的是甚麼呢。只要你行公義、好憐憫、存謙卑的心、與你的神同行。」（彌迦書6章8節）
上帝要我地唔係要讀幾多個主日學課程，佢係要我地行公義、好憐憫，如果你會因為趕住返教會，而見到有個伯伯需要人幫都唔去幫佢既時候，咁你算係哪門子的基督徒？
我以前報主日學係覺得非上不可，但係無原因想讀，只係知道要報，但係無一次完成課程。因為我上第一堂已經覺得導師所講既，都只係講聖經上面既野，只不過係加左故事做比喻，加左貼近現實既故事，僅此而已。更何況每一個人睇聖經，都會有唔同既領受，又何需要將別人的領受硬套在自己身上呢？而我又點解唔自己睇聖經呢？報主日學係基於咩心態呢？係基於「反正星期日上午得閒無野做」、「唔想話俾人知自己無上過主日學」、抑或係「上主日學係對神有個交待」呢？

回顧返我朋友既經歷，平心而論，如果我淨係睇以上日誌所寫，我覺得雙方對於事件既處理手法可以再好0的。
首先我唔知我朋友既投訴信有幾"cynical "，但係我認為最直接了當既方法係，面對面咁解決問題，起碼唔使浪費寫信、打電話既時間。如果對方都仲係要逃避，你都無佢辦法，起碼自己願意行出第一步去瞭解事件，咁樣做對得住任何人，自己亦都問心無愧。
我只係認識好少對教會有意見，但係又愛主既朋友，佢地既意見中肯同合理(起碼我咁樣認為)，絕對係有助教會成長同發展。政府都識先諮詢民意，之後意見接受，態度照舊。有批評、有意見，先有進步既空間；無批評、無意見，何來進步？

我覺得有一句說話都幾有用，無論你信左主幾耐都一定有用：
「What would JESUS do today?」
做任何事情之前不妨問問自己，如果耶穌遇著同一個境況佢會點做？

I have no future

「I have no future」呢一句說話係我晌泰國短宣個陣一位姊妹同一位小妹妹傾計個陣，個小妹妹講既。正常黎講，八九歲既小朋友係應該滿有夢想、盼望同喜樂。而家既世界貧富懸殊越來越嚴重，發達國家既小朋友越黎越唔識得珍惜，因為所有野都係垂手可得，而第三世界既小朋友就三餐都得唔到溫飽......

去完第一次短宣，我好有衝動去讀神學，問過其他人意見都係覺得等多一年，因為如果呢個係神既帶領，一年之後衝動就唔會再係衝動，而係感動。晌個陣考警察既心態已經開始丟淡，唔係唔考，只係覺得做唔做到都唔係好大問題，但係會考就照考。

到而家去完第二次短宣，考完會考，英文2分，僅僅合格，但係已經唔想再考警察，一黎已經決定左去美國讀書，12月1月就過去美國；第二係因為睇到警察有好多負面新聞，睇到既時候，我往往都係嗤之以鼻，令到我考警察既心又淡多一分，而今次短宣有件團衫，上面寫住「踐行公義」四個大字，我覺得背負呢四個字個感覺好沉重，但係同時間覺得係一個榮耀，係一種推動力。我開始明白點解我之前咁想考警察，我想做既就係「踐行公義」呢四個字，但係今日我知道要「踐行公義」，唔一定要做警察！

「世人哪、耶和華已指示你何為善。他向你所要的是甚麼呢。只要你行公義、好憐憫、存謙卑的心、與你的神同行。」（彌迦書6章8節）

無題

琴晚搭夜機返香港，去完今次短宣體會又深一層，
今日返崇拜唱到「這一生最美的祝福」既時間，
眼淚不停咁淚出黎...
這一生最美的祝福，就是能認識主耶穌，
這一生最美的祝福，就是能信靠主耶穌，
走在高山深谷，祂會伴我同行，
我知道，這是最美的祝福。
我除左係睇到上帝俾我既恩典，
更加睇到上帝俾Bamboo School既恩典，
更加睇到上帝俾個到既弟兄姊妹既恩典，
個刻好有感動去做一世既宣教士，
但係我知道如果要做宣教士，
除左要有基本既神學智識，
更加要有一技之長，
所以而家既目標係讀好書。

這一生最美的祝福

在無數的黑夜裡，我用星星畫出你，
你的恩典如晨星，讓我真實的見到你，
在我的歌聲裡，我用音符讚美你，
你的美好是我今生頌揚的。

這一生最美的祝福，就是能認識主耶穌，
這一生最美的祝福，就是能信靠主耶穌，
走在高山深谷，祂會伴我同行，
我知道，這是最美的祝福。

泰國曼谷Bamboo School之旅

8月4日至9日我將會同20名大小朋友造訪距離曼谷國際機場四小時顛簸車程的位於Bongti的Bamboo School.這裏是泰國與緬甸西北面接連的邊境地區，而Bamboo School是泰國境內一所緬甸克倫族(Karen)難民兒童收容所，內裏住了幾十個由數月大至十多數的孩子，大部份是孤兒。他們有些被窮困的雙親遺棄，有些從老遠的緬甸山區的家走幾天山路來到Bamboo School以逃避緬甸軍隊的追捕。Catherine Riley-Bryan是紐西蘭來的宣教士，她在2000年開始了Bamboo School，在這裏提供醫療、食宿、基督教信仰和基礎教育給孩子。Bamboo School的孩子自少缺乏愛，也有很多極傷痛的回憶，他們需要關懷、擁抱和鼓勵。

組織團隊到訪Bamboo School 是全球基督徒團結陣線(香港)每年的重點工作之一，今年他們召集了20名來自香港不同教會的大小朋友參加這次旅程。今年的特別任務是建立一個籃球射板，讓孩子們有更多鍛鍊體魄的活動設備。此外還帶了大量顏色筆和維他命丸作為禮物，還會預備為他們煮一頓飯 --- 咖喱薯仔雜菜伴飯團！

經過上一次既緬甸短宣，我好感受得到咩叫與神同工，一直好希望晌今年可以去多次短宣，雖然我地去唔係可以幫到當地既人好多野，畢竟只係去7日，而我地去只係想話俾當地既人知，上帝係唔會丟棄任何一個人，讓佢地感受上帝既愛。

「你係得架」

「你係得架」呢句說話我聽過好多次，
好似中學既老師，到而家做野既老細都有同我講過，
你話係隨口講下咩，我覺得唔多似，
因為佢地同我講過不下數次，
但係我始終都唔係好明，
究竟我得，係得0的咩呢？
點解我從來都唔發覺自己得？
唔通係我唔夠自信？(我承認呢點)
抑或係你地覺得我得既野，晌我既層面覺得係理所當然呢？
今日老細又同我傾計，
佢話連助理總幹事都話「雖然Kenny係唔夠smart，但係我見佢都做得既架喎」
助理總幹事見過我既次數，都唔知夠唔夠10次。
你可以話佢只係講0的官腔既說話，
但係佢講呢句既時候係同我老細開會之前，
我相信官腔極有限。
究竟我既能力係晌邊到，又可以去到幾高呢，
我到而家都未知，
呢0的野真係只有天知道！

「教練」

前排許sir打俾我搵我幫手教水(游水)，
可能係岩岩決定左去美國讀書，12月先走，
所以諗都無諗就應承左佢，
就好似今次去泰國教小朋友打波咁，
我都係諗都唔諗就報左名，
教左好幾堂水，發覺自己好享受教既過程，
由個小朋友唔敢浸個頭落水，(註：我唔係兇佢浸個頭落水到)
到而家可以做到擰頭呼吸，
個種成功同滿足感，
真係唔係做一般既行政工作可以有既，
我之前都教過一個22歲既學生，
個陣我細佢幾歲，
佢由唔識游水，到識游自由式，
個種滿足感真係非筆墨所能形容。
我有諗過「教導」會唔會就係我既恩賜呢？
而家我仲未可以肯定，
可能當我讀完大學，
到時又會係另一番既光境。

無題

今朝一早DHL就速遞左一封信俾我，
係美國寄黎既...上面話大學已經收左我，
上面仲有好多既日期話俾我知幾時要做乜野，
例如我幾時要去學校報到咁，
但係我一睇，打左個突，仲以為自己睇錯，
上面寫要我8月19日去報到，
我連visa都未簽，
同埋我都無諗過咁快過去......
雖然話早一個學期開學會好0的...
但係我真係未有咁既心理準備...
完全係我預算之外，
我仲諗住可以跟許sir學多0的有關教游水既野，
仲諗住跟施sir學教波既野同埋搵佢做單對單訓練，
仲諗住......
真係人算不如天算......
而家唯有申請visa啦......
現實就係咁架喇...

無題

今日終於都交左兩份表格，
一份係入讀美國新墨西哥大學既表格，
另外一份係參加泰國籃球短宣隊既表格，
無錯！我又去短宣喇！今次係泰國...
今次仲要係有人資助$3000，太正喇！
事源係幾日前收到henry一個關於泰國籃球短宣既資料，
內容同普通短宣差唔多，只係做埋籃球訓練，
而時間又岩岩好，係8月4-9日，
仲有一樣野係henry話會資助$3000，
而有得再次短宣，又有得打波同教波，仲要有人資助，
真係一次過滿足我三個願望，
雖然今次會有好多外國人同行，
但係我都會義不容辭！
就係咁我去第二次短宣喇！！

未雨行動

大家俾俾面，得閒無事就瀏覽以下個網↓
http://missionwell.bgca.org.hk/
雖然我就黎唔做...
就當幫下同工減輕一下壓力...
因為一個網站做得好唔好，
全靠個瀏覽量...
如果瀏覽量夠就當然皆大歡喜啦！
相反，就會俾人問點解個瀏覽量咁低...
所以大家幫幫忙，上一上個網，谷一谷個瀏覽量...

主角定係過客！？

有陣時人會好想去成為別人生命中既主角，
但係極其量都只不過係別人生命中既配角、甚至係過客。
過去我會好在意人地晌我生命中所做既事，
無論係好係壞，我都會好在意，
就好似別人先至係我生命中既主角咁。
現在雖然俾我搵到生命中既監製、導演同編劇(上帝)，
但係我仍然俾過去既人同事影響我現在既演出，
忘記自己才是自己生命中既主角。
到今日我先至真正明白到，
何謂「過去已成為過去」，
過去已經改變不了；
未來才是掌握在我手中。
我可以選擇繼續被過去既事影響我既未來，
但係我亦都可以選擇忘記過去，
演好編劇寫俾我既劇本(聖經)，
創造屬於自己既未來！
「弟兄們，我不是以為自己已經得著了；我只有一件事，就是忘記背後，努力面前的，向著標竿直跑，要得神在基督耶穌裡，從上面召我來得的獎賞。」（腓立比書3章13-14節）

無題

今日終於都考埋Oral喇！
考既題目竟然同上年差唔多...
都係環繞結婚...
不過自問係好過上年既...
點都好啦...好好醜醜都考完喇！
等4/8放榜啦！

無題

今日練波好爽！
可惜既係手感差左，得唔到分...
不過就做左好多單擋...
體能都還可以。
真係要練番多0的手感先得喇...

「假設」、「以為」

原本今日做野好有衝勁...
點知老細叫我回覆佢一個我遺忘左既工作跟進...
就係咁我用左半個鐘去諗個解決方案...
點知都係未解決個問題...
之後仲要做個工作面談...
俾老細講到我係一個好差勁既人咁...
成個人灰晒...
第一個感覺係好想辭職，
因為越做越無成功感，
開始係為份人工去打工...
不斷咁問上帝點解要放我晌呢個位置？
放我晌呢個位置究竟要我學0的咩？或做0的咩？
但係原來佢係要我重新認識自己...
我終於都明白問題係出現晌邊到...
問題唔係我唔夠膽同人溝通，
而係我成日都自作聰明，
做好多既「假設」同埋「以為」...
往往出現好多自以為是、好多既誤會...
因為我已經假設左人地會點樣答我...
因為我以為人地會知道我想點...
所以我就唔會同人作出溝通，或者係唔會去求證個答案。
因為我「以為」事情會好似我「假設」左既結果咁去行。
但係諗返轉頭，原來我大家姐已經一早知道我既問題...
只係晌個陣我答佢：「咁唔係咩！」
仍然都係「以為」自己無錯。
當我知道問題晌邊既時候，我好想即刻去改。
第一小步，我知道我已經踏出左...
「即知即行，知而不行，是為不知。」
只係唔知可唔可以維持落去......

真正既大隻佬

有陣時聽到有人話我「大隻」等等既形容詞既時候，
真係得啖笑，同埋我真係唔敢認，
我最多都係答：「咁都叫大隻！？」
而家就等我話俾你地知咩叫「真正既大隻佬」啦！
Ronnie Coleman 44歲
5呎11寸，297磅
1998開始連奪8屆Mr. Olympia 冠軍
(以下短片為Ronnie Coleman於99年奪得冠軍時的表演短片，不喜歡健美的人勿看！)

名副其實既大隻佬！
千祈唔好話我有病，咁既短片都睇。
如果你覺得核突、嘔心既話，只係你誤解左健美呢項運動。
其實呢項運動係好講求個人既自律性、自制能力、意志、毅力、耐性等等。
健身既好處係可以練到全身每一吋肌肉。
當然仲可以有好既心肺功能啦！
因為如果想要有線條美(並唔係大大舊肌肉)，就要做大量既帶氧運動消除脂肪，如跑步、游水等等。
真係想快0的練到有線條美，同埋均勻0的
(唔係上身好大隻，下身似碌竹，呢種好明顯係只練上身，唔練下身)
咁樣實在係太有型喇！
但係呢0的野並唔係一時三刻就可以成功。
希望我唔會再停止訓練啦！

無題

今日做掌上壓...
唔知點解覺得唔係好順...
個感覺好唔同，動作好似錯晒咁...
真係要問下人發生咩問題...
所以做左3組共60下就無做...
只好將個重點放左晌sit up...
都係做左3組，一共210下...
呢幾晚都好夜目訓...
發覺自己既時管真係有夠差勁！
每晚都係一兩點先目訓，
又唔係做重要野喎...
就係晌到做埋晒0的鎖碎事...
我感覺得到惡性循環又開始喇...

無題

琴晚淨係做左重量訓練同埋拉筋...
今晚去左順利村比賽，
一樣都係做後備，
本來上半場都贏緊，
但係人地黎左個前港隊球員-宋方，足足高我一個頭......
完場倒輸9分...
都好架喇...唔係輸廿幾分...
之後返屋企就去左跳繩(因為比賽無咩點出汗)...
今次成績係15分02秒...
希望下次可以晌15分鐘之內...

重新投入訓練！！

今日收到施sir俾金巴崙籃球隊有關專業籃球員既電郵。
裏面有一句說話重燃我對所有事情積極既態度。
「你可以沒有高比拜仁的彈跳力，運球功夫，但你卻可以擁有他的態度。」
一個人既成功取決於佢既態度，
可以講係老生常談，
但係又有幾多人可以維持住呢份積極既態度呢？
琴晚我又開始去做重量訓練同埋做一0的練武既基本功，
今晚就做左彈跳力跳繩訓練：
雙腳(同時落地)前後跳400下
雙腳(同時落地)左右跳400下
單腳左腳跳250下
單腳右腳跳250下
時間係17分30秒。
比起幾個月前差左好多......
之後就係每晚都做既練武既基本功。
希望我呢團火係最後一次重燃...
希望呢團火可以燃燒到生命既盡頭！
我可以無專業既學識、技術同埋能力，但係我可以擁有專業既態度！

無題

今日八點幾俾個黑雨嘈醒左...
打俾督導...佢話如果11點半後都未取消就唔使返工...
點知當我目訓到十一點幾既時候...
督導打俾我「Kenny，落左黑雨喇，要返工喇。打埋俾同事啦。」
「哦..........」
唔係咁好玩呀嘛......
最搞笑既就係我連發夢個陣都返緊工...
想目訓多陣都唔得......
講番我俾人屈單野，
當督導向隔離團隊督導提出要面對面咁瞭解成件事既時候...
對方竟然用冠冕堂皇既藉口拒絕開會...
誰對誰錯，昭然若揭。
如果你唔係屈我既話點解唔夠膽開會講清楚！
最後因為督導主任同隔離團隊督導傾左0的野...
我督導就話既然督導主任都想小事化無...
(當然啦！因為而家錯既係佢既「愛將」嘛！)
咁都無謂去得咁盡...
凡事留一線，日後好相見嘛...
咁我都無所謂...
只係晌呢件事上我學識如果道理晌自己到就唔好忍氣吞聲...
如果唔係你會好蝕底...
因為當你對人仁慈既時候，等於對自己殘忍！

無題

好聲好氣對人...換黎既係死貓一隻...
唔出聲唔企出黎澄清人地就當你係病貓...
仲要俾人話表達能力差...
今次真係氣難下...
四個人屈我一個...
我表達能力唔係真係差成咁呀！
愛情如是！工作亦如是！！
好彩仲有兩樣野我係永遠都唔會因為咁樣而失敗既...
一樣係親情，另一樣係信仰...
星期五就會開會...三口六面face to face咁瞭解成件事...
到時我就要睇下人地點樣扮弱者...點樣有團隊精神四個屈我一個...
我就要睇下一個督導主任點樣親疏有別...

無題

今日感到好灰...
一黎比賽打得唔好...輸左波...
二黎工作上感到有點兒挫敗同無癮...
隔離部門做報價...我又係做報價...
點解人地份報價單...
最少要有五間公司就報得四間...仲要有一間係重複...姐係得三間
又無個人建議...我每次做都一定要有個人建議...寫明點解你會建議某間公司...
最離譜既係四間公司所提供既商品都唔一樣...
叫人點比較呀...
最好笑係個大老細竟然話個同工FAST ACTION...
仲用電郵公開讚個個同工有效率...
反觀我所做既紀念品報價...報左24間公司...
就算係預算之內...有埋紀念品既賣點...
有埋我自己既個人建議又如何...
一句話話錢箱淨係得一個意思「儲蓄」作賣點唔夠...
咁又要再做過...真係吹脹...
但係以錢箱作為紀念品係贊助商都同意架...
「儲蓄」本身就已經係一個賣點啦...
就算我之前搵過有其他賣點既錢箱咁又點...
一樣俾人彈返轉頭...
而家仲要我地上廣州搵樣板...
點解人地工作唔達標都可以加$2000人工...
我地做到隻狗咁...唔加人工不特止...仲要俾人話做野慢...無效率...
我真係唔知晌呢件事上仲可以學到0的咩...

無題

好耐都無寫野喇...
最近真係好忙...
工作上要跟進既野真係好多...
又要跟紀念品、又要跟教案既道具、又要跟網頁...
好多好多零零碎碎既野要跟...
不過對前路就好似明朗左...
決定考TOFEL個陣，阿媽竟然話考唔到咪過去美國讀英文班囉...
真係話咁易？
唔知點解所有時間都好似好吻合咁...
最近發生既事同所經歷既唔多唔少都影響左我去美國讀書既決定...
雖然未知簽唔簽到証或者大學收唔收我...
但係最起碼我都有左方向先...
而家除左想考好會考ORAL之外，
就係想考好個TOFEL...

多多益善‧少少無拘

http://2.bp.blogspot.com/_bmyoGjpRjBo/SDL4xt_Ls3I/AAAAAAAACkY/Wq-9CFJ37Zs/s1600-h/china
呢個網頁裏面有16張相，係我既朋友影既，
雖然佢身在日本，
但係佢心繫中華。
佢想為四川既同胞出一分力。
如果大家對網頁入面既相有興趣又想要既話，
只要你將善款捐入任何一間慈善機構，留有單據，
並將你既單據影低或者scan入電腦，
再連同你想要既相個NO.，電郵至以下地址↓
linuxjackie@hotmail.com
咁就得架喇！
多多益善‧少少無拘

前路......

最近工作好似點做都達唔到大老細既要求...感到很乏力...
其實我都明白問題係出現晌自己到...
每星期都要加班...
講得好聽就勤力，
講得唔好聽就工作能力不足，要將勤補絀...
但係其實係心態既問題...
我試過中二一個人做模型，
俾老師放左晌禮堂作為展覽活動既一個模型。
亦試過中六既fashion show，
一個人完成左一套衫既8~9成，
晌一個失而復得既情況下獲獎。
當時既心態都係好有心去做，不眠不休都想做好佢。
督導都話過我呢份工就好似係我既兼職，
準備考警察或者係英文先係我既正職。
之前決定留任係相信自己可以改好工作態度，
而家工作態度就有改善喇...
就到工作能力受考驗...
呢幾日都有唔做呢份工既念頭...
但係呢個念頭一出現，就有更多既問題出現，
英文又未考完...警察又唔知考唔考到...
唔做又要搵工...唔做又好似辜負左督導既期望...
又想讀番書去大家姐到留學...
又唔知簽唔簽到証...又唔知大學收唔收...等等...
總之就係拿不定主意...阿媽又好似支持我去美國讀書...
我諗都係時候為到自己既人生負責任，
做人有陣時真係需要把心一橫，
趁我而家仲年青，仲有機會俾我闖既時候，
點解我唔可以放膽闖一次呢！

人命何價？

緬甸既風災，四川既地震......
受影響既災民成千上萬...
每個國家、每個救援組織都希望可以伸出援手...
但係反而被人拒諸門外...
究竟人命何價？
四川既同胞遲救一秒，就可能已經無左好幾條人命...
祖國同埋緬甸既政府，請你地開放救災！
而家我可以做既除左捐錢，
就係為到災民祈禱，同埋為到祖國同埋緬甸既政府祈禱...
希望佢地可以開放救災，拯救更多人命。

從寬恕看神與人的分別

在世間，萬有中，哪會有仿似耶穌？
呢幾句歌詞加上最近發生既事，
令到我諗通一樣野...就係上帝既寬恕同人既寬恕有咩分別。
先睇下我地萬物之靈，
我覺得人既寬恕大多數都係「後知後覺」既，何解呢？
打個比喻，當人地講大話呃你既時候，你會好嬲，
甚至你會話唔會原諒講大話呃你既人，
呢個時候你係受害者。

但係當你由受害者變成講大話既人，
當你傷害左人既時候，你會後悔，
儘管你講既大話係善意定惡意都好，
因為你都知道講大話始終都係錯既，
所以你會希望得到俾你傷害左既人既原諒，
晌呢個時候你會諗起曾經講大話呃你既人，
晌呢個時候你會感受到得唔到人地原諒既心情，
晌呢個時候你就會收返「唔會原諒講大話呃你既人」呢句說話，
你會開始去寬恕講大話呃你既人，
人地問你點解會原諒人既時候，
你可能會話：「都過左去啦！佢都知錯....」等等門面、表面既說話，
但係其實你心裏面知道，亦都明白，
係因為你都講過大話，你都呃過人，
所以你先至會識得易地而處，企晌對方既立場諗，
晌呢一刻你先會識得原諒寬恕講大話呃你既人。
不過好可惜，晌同一刻你都傷害左人，出現多一位受害者。
我叫呢一種寬恕為「後知後覺」。

反觀上帝既寬恕，
「耶和華不輕易發怒、並有豐盛的慈愛、赦免罪孽和過犯、萬不以有罪的為無罪、必追討他的罪、自父及子、直到三、四代。」(民數記14章18節)
以上既經文講出上帝係公義既，上帝萬不以有罪的為無罪，
有人可能會話佢係神，焉知人既難處，人既軟弱呢？
但係你要知道上帝既慈愛同公義，永遠都係慈愛行先既。
「主所應許的尚未成就、有人以為他是耽延．其實不是耽延、乃是寬容你們、不願有一人沉淪、乃願人人都悔改。」(彼得後書3章9節)
所以佢先至會派佢既獨生子耶穌基督黎到呢個世間上，道成肉身。
耶穌基督佢完完全全知道我地做人既軟弱，
因為耶穌基督既係人，亦係神。
耶穌晌世上縱然都會有人既軟弱，但係耶穌從未犯過罪，
就連晌被釘十字架既時候，耶穌都為個班釘佢十字架既猶太人求父神寬恕佢地，
「當下耶穌說、父阿、赦免他們．因為他們所作的、他們不曉得。」(路加福音23章34節)
在世間，萬有中，哪會有仿似耶穌？
耶穌唔需要去傷害人都可以知道我地既軟弱，
所以耶穌甘願用佢既血洗淨我地既罪，
「神愛世人、甚至將他的獨生子賜給他們、叫一切信他的、不至滅亡、反得永生。」(約翰福音3章16節)
我叫呢一種寬恕為「未知先覺」。

「你們若單愛那愛你們的人、有甚麼可酬謝的呢．就是罪人也愛那愛他們的人。」(路加福音6章32節)
容許我轉一下個講法，
「你們若單寬恕那曾犯過你們所犯的罪的人、有甚麼可誇的呢．就是罪人也如此行。」
我地可唔可以做到唔需要犯某種罪，就可以寬恕犯個種罪既人呢？

無題

今日第一次跟金巴崙出隊比賽，輸左。
但係我第一次無睇分牌比賽，
因為我在意既已經唔係贏或者輸，
而係自己有無進步，
不過好可惜雖然晌場外我係有丁點兒既進步，
但係一落到場比賽，個丁點兒既進步就已經變得微不足道，
太弱、太渣、太差勁喇！！！！！
台上三分鐘，台下十年功。
呢句說話真係無錯。
要再加把勁練習、練習、再練習！
返屋企個陣撞到仲明同阿Ray幾個人食飯。
同仲明傾左幾句，
佢話我(信靠神個方面)進步左，
晌某方面，我唔聽上帝話，撞過一次板，我已經覺得好夠，
一次咁既經驗我都嫌多，更何況要我有多一次！NO WAY！
所以我寧願等上帝既安排，
因為我知道佢既時間表永遠都係最好既，
佢俾得我既野亦都係最好既。

無題

放左幾日假(雖然係考試)，
但係今日返工竟然提唔起勁...
不過聽日開始就要打起萬二分精神...
因為我老細同大老細之間既問題已經進入白熱化階段...
係我老細同我講既，
佢話佢地兩個既話題切入點就係我...
我想唔醒定都唔得啦...
有時聽我老細講真係都幾唔公平，
同一個中心，兩個部門，大老細既要求竟然係南轅北轍，
我地既部門上一年既贊助係60萬，一年完左都仲有幾萬蚊淨，
但係人地既部門呢？負55萬，係負呀！！
我地得閒死唔得閒病，個個都要開OT，無得補。
大老細竟然一句時間管理唔好囉...
而人地部門個個都可以5點半拍拍屁股就走人...
準時放工我都想呀...

熱情

我真的很愛你，請接受我的愛......
我可以獻出很多時間和所有，祇因我愛你
為了你我可以做任何事，可以去任何地方，所以請你一定......

我幾時先會學識對上帝講出以上既說話呢？
我始終都係太嫩喇！

03-05-2008

考完listening喇！
只淨最後一科ORAL。
無打成個月波，
今日一次過打左5個鐘，
打番夠本，真係好爽！

無題

終於都考完reading同writing...
唔好問我關於考試既野...
因為再多既討論都改變唔到我所寫既答案...
所以倒不如俾我安靜既時間去應付埋聽日既listening...
不過值得講既係我考試坐既個個位好正，
除左睇唔到其他考生之外，
仲係坐晌課室最近窗既位，
見到一大片綠油油既景色，好正！
心裏面即使出現一段經文：「得力在乎平靜安穩。」(以賽亞書30章15節)

會考之期

聽日就會考喇！
今日補多一堂...去搵埋間學校...
溫下生字就(目訓)喇...
可以準備既，都準備左。
謀事在人，成事在天。
明天就看著辦吧！

無題

聽晚阿爸阿媽返黎喇！
太好喇！除左係屋企多番人之外，
其次既係阿媽晌美國買左部iPhone俾我，
嘩哈哈哈哈....真興奮！
今日我終於都將幅3000塊既挪亞方舟砌圖砌好，
用左成年既時間，砌下停下，砌下停下....
終於都砌好，不過可惜既係晌搬屋既途中唔見左12塊...
等遲一排有閒錢先買過幅，砌返佢。

會考前夕

仲有一日就英文會考，
呢次考試所做既準備毫無疑問係比前兩次多左既。
起碼有做下英文，作下文...
不過自己知自己事...
始終都唔係盡全力......
只可以話係有出過力......
不過都好過以前考天才。
補埋聽日就真係要靠神同埋自己。

無題

今年我其中一個個人工作目標係要讀一個課程，
所以早前報左個項目管理函授証書課程，
今日上第一堂...個半鐘...
出奇地無(目訓)覺，仲覺得時間過得好快，
不過有一個好大既問題，
就係要交功課，其實交功課唔係問題，
但係個問題係要用英文寫assignment，
仲要交3篇，每篇最少要2版紙...
我淨係試過用英文作文，仲要係作250字...
今次慘喇...我仲設個工作目標係要合格...
而個課程合格既定義係五堂上四堂，
同埋交assignment3篇...
點算好呀...
神啊！救救我吧！

實踐夢想的勇氣

夢想...係人都有...
我同你都一定會有...
但係人大左，會因為家庭、工作等等既原因放棄追求夢想...
但係我認識一個接近40歲既中年男人，
佢試過失業，試過俾籃總拖過教練費，
但係佢無放棄過教籃球，
佢教籃球唔係為興趣，
為既只係想佢每一個學生可以晌籃球場上學做一個負責任既人，
而家佢係一個副學士既講師，一個全職既籃球教練，
佢既夢想係晌香港建造一個私人既籃球訓練場。
你可以話佢天方夜譚，痴人說夢話，任你點講都好，
起碼佢勇於晌有限既人生入面實踐佢既夢想！
不論佢係成功或失敗，最起碼佢都叫做實踐過佢既夢想！
咁你呢？你既夢想係咩呢？你係唔係遺忘左呢？
定係你既夢想只係不斷搵錢呢？
大家一齊黎見證一個夢想的誕生！
http://www.c-sir-dream.blogspot.com/

苦盡甘來

終於都出版左喇...

辛苦左一年...本財商教案終於都出版喇...
呢一本係香港第一本俾老師用黎教學生理財既教案...
我竟然可以參與整個編輯過程。
從只有工作坊既內容，到有8-9堂每堂兩小時既內容；
由報價，到較對，再到出版；
由發生版權問題，到搵律師諮詢意見；
由試驗階段，到而家推入學校到用等等好多好多......
諗起幾年前我仲讀緊人地做既教科書...
點知而家不單止有學生讀，而且更有老師用黎教...
真係我幾年前始料不及既...
我相信晌香港唔係有幾多個年青人可以有咁既經驗...
上帝俾得我有呢個經驗，
我知道晌將來一定有用武之地既。

初為人(舅)父

生左喇！生左喇！生左喇！
大家姐終於晌4月23日美國時間下午9時45分順利誕下Kina Dodge，重8.7磅↓


聽二家姐講，大家姐係陣痛左16個鐘先至生得。
仲要係自然分娩！
大家姐真係大家姐！
我晌到向你致敬！

仰光短宣第二回

20/03/2008短宣第三日
今日上午都係同小朋友唱詩歌、講聖經故事。
不過就講挪亞方舟既聖經故事，當然係由Venus主講，我同阿Pat協助啦！
既然三個都要講故仔，就梗係無人影相啦！
不過都有英文班既相↓

睇下佢地幾專心！！
你估下佢地學緊邊幾句英文？
就係呢幾句喇！↓

教緊英文班既同時就有一班Micro-credit women黎Centre還貸款。
當然Calza唔會放過一個咁好既傳福音機會啦！
所以就有個聚會，由我地香港短宣隊既Venus，第一個分享見證！
當然有人做翻譯啦！Rebecca(畢左業既神學生)係我地Centre既首席翻譯！
之後就係班太太畫雞蛋，同埋晌一個籃裏面搵返佢地隻蛋出黎。
而當日就有18位姊妹決志或者係再次決志既！感謝主！
最令我大開眼界既係佢地決完志之後，只有一位陪談員Rebecca同佢地講述得救既確據！
1對18...香港人你真係幸福呀！決志都可以係1對1，甚至係2對1既陪談......
不過聽Calza講返其實佢地之所以再次決志，
係因為未清楚得救，或者係唔知決志只需要做一次。
但係因為晌當地做栽培有難度，所以只可以維持現況。
不過感謝主，係因為當中都有婦女黎左Centre三年！
好似下面個位太太咁，我完全可以感受到耶穌晌佢心入面既個種平安同喜樂！↓

Andrew and Rebecca↓

一張大合照↓

晌酒店住左兩晚，就搬左去一個宣教士既屋企到住。
因為酒店實在太貴喇！30美金一個人一晚，宣教士個間屋就平得多喇！30美金一個人六晚。
雖然有機會停電，但係住左六晚都係試過晌接近黃昏個陣停過一次電。
後記：因為21/03要去探訪孤兒院既關係，所以我地三個就要準備好一篇英文既見證。而我當晚就用左兩個鐘頭黎寫左一篇。但係如果我一早知既話，我一定晌香港寫定，跟住搵Zoe幫我改文，再騰埋文先去短宣！不過好彩都有Venus幫我地改文。

21/03/2008短宣第四日
今日我地同埋同工一行十二人去探訪兩間孤兒院。
其實成個短宣做既野都係唱詩歌、畫下雞蛋、搵下糖同埋雞蛋咁...
一黎係想同工知道個流程，做熟個流程，
因為如果你變得太快佢地會跟唔上你既步伐，始終香港人既節奏比較快，
佢地會適應唔到。
二黎係可以一次過準備好物資，節省時間。
去第一間孤兒院個陣我地係坐單車，一部單車右手邊加兩個背對背既位...
我就同一位神學生Andrew坐一部，我真係替個單車司機辛苦呀...
我160磅，加埋Andrew大約130-140磅，總共差唔多300磅...
總要係晌烈日當空之下，踩30分鐘...真係......
好彩之後Calza有俾小費佢地。
晌去緊孤兒院既時候，Andrew同我傾計...(用英文)
好彩都唔算差，聽得明既就答一句，聽唔明既就i see一句....

第一間孤兒院Master Seed

由同工獻詩，跟住係阿Pat分享見證，之後就到短宣隊獻詩。

緊接住既就梗係畫雞蛋同搵糖和雞蛋啦！




最後係班小朋友獻詩↓


聽佢地唱既時候，我感受到佢地個種由心而發震撼力！
後記：我晌呢間孤兒院睇到一個籃球架，你唔好以為有籃球架，就覺得佢地應該幾有財產。我見到個個係木造既籃球架，籃板只有三塊木板，同一個又曲又歪既籃框。諗起香港既籃球架，實淨得黎仲要有網，真係幸福呀！

我地去完第一間孤兒院就直接行去探訪第二間孤兒院Billabons

今次終於都輪到我分享見證喇~~~Venus好一句「上帝會墊底」
我記得第一次分享見證係窩福籃球隊打友誼賽個陣，
第二次就係今次短宣分享見證，仲要係用英文，我問你死未。
好彩有貓紙，就算Rebecca聽唔明我既英文，佢都仲可以睇我張貓紙翻譯。
就係咁我就完成左我第一次用英文分享見證喇！
你睇佢地幾開心↓梗係啦！聽完個見證，只要答中問題就有獎喎...

之後就到Andrew分享見證，完全聽唔明，因為佢用緬甸文。

跟住係畫蛋時間↓





畫完蛋之後，就要有段時間俾同工收埋糖同埋雞蛋。
咁呢段時間我地就教佢地摺星星，佢地好雀躍，亦都好專心咁學。



摺完之後，我地就用一個樽裝好↓


又係搵雞蛋既時候↓



最後就到班小朋友獻詩。
呢位姊妹唱個陣↓

雖然只有結他伴奏，
雖然我聽唔明佢唱咩，
但係就完完全全咁感動到我，觸動到我既心靈。
好彩我聽唔明佢唱咩，因為有一刻我差點就滴下淚來...
佢唱完之後，我見到有位同工晌到喊。
我諗如果我聽得明既話，我都會喊......
其後問返同工，原來佢唱既歌係關於父母既愛。
晌佢地既歌聲同埋舞蹈入面，我感受得到佢地既喜樂↓


佢地就好似想話俾人聽，縱使佢地係孤兒，
但係佢地有著從上帝而黎既愛去保守住佢地。
我覺得佢地比我更親近父神。


夜晚由阿Pat下廚，整左個冬陰功既蝦，(簡 簡 勒)！

21-04-2008

今晚去左蘇記食飯，跟住妹姐搞左個gag出黎...
就係將隔離檯支啤酒放晌我到...
本身係個笑話黎既，不過之後我就笑唔出喇，
因為又俾人用對基督教一知半解既「偉論」黎暗串我...
佢同妹姐講：「你唔好搞到人地神父破戒先得架！神父唔飲得酒架！」
呢位熟客，我想講
第一我唔係神父...我係基督徒...唔係天主教徒！
第二神父飲唔飲得酒我唔知，我淨係知聖經哥林多前書10章23節咁樣記載：
「凡事都可行；但不都有益處。凡事都可行；但不都造就人。」
好似食煙飲酒害人害已既野，我唔係唔做得，只係我唔去做！
最氣頂唔係我諗唔到點樣回應佢，
而係諗到都要基於佢既面子，
同埋唔好俾人話我無大無細，
而唔可以咁回應佢呀！！
最後我講左一句：「你未見過就唔代表無既...」
如果我唔係有個顧慮晌到，我一早就護左教喇！
仲使一見到你就俾你冷嘲熱諷...

原諒

只有恨，是會更加寂寞，必需要，拋開積怨的軀殼，
於世上，誰人從無幻覺，犯錯，走進死角，
不再問，是那方的錯誤，只知道，彼此都也覺辛苦，
請放下，遺忘重重事故，嘗試減輕痛苦。

能再看清楚他兩眼睛，能記憶起當天的高興，
能原諒他幹過每件壞事情，這種愛才是真感性，
能設想他的感覺處境，能徹底張開心窩傾聽，
能原諒不再記掛舊日事情，這種愛贏得致敬。

神為你捨己甘願犧牲，憑著愛寬恕世上罪人，
成就了祂的應許，祂的拯救，
這種愛才是真愛，如你學懂這寬恕的心，
憑著它可將心窩拉近，無用再分你我對或錯。
一起牽手將永恆擁有，真愛可擁有。

19-04-2008

今晚去左補習，
zoe既媽咪問我去短宣好唔好玩？
我個反應係「又係呢個問題......」
之前我一聽到人地咁問我，
我一定會答：「唔係用好唔好玩黎形容既，體會深左囉。」
對方既反應通常都係迷茫和帶點尷尬，跟住問：「咁姐係點呀？你去個到唔係玩既咩？」
但係今日我遲疑左一陣答：「好玩。」
答得好事工性...以為今次顧慮到對方既感受啦...
點知返黎既回應竟然係「乜你去個到係玩既咩？」
我愕左然，乜你咁問唔係想我答好玩咩？
慚愧，真係慚愧......
竟然係我自己將今次短宣既意義降低，去到一個遊玩既層次......
竟然無忠於自己既感受...真係有點兒那個呀...

05年08月28日我洗禮的見證

→回想小學階段，因為父母從事飲食業的關係無暇照料我，經朋友介紹下將我送到一間無牌經營的私人補習社裏，過著一星期七日朝九晚十的童年。在那補習社五年半的歲月其間有幸有不幸，先說不幸的是那補習老師是個常用體罰的人，但更不幸的是在那裏補習的小朋友的家長不但沒有阻止，反而大加鼓勵。而我的父母亦不例外，因而形成了我要以壞行為來取得大人注意的心態，當時的我可以說是「好的不學，壞的學到足。」更被補習老師指責為「犯眾憎」。而可幸的是，那補習老師是位基督徒，我不是慶幸她是基督徒的緣故有著基督的品格。而是慶幸著逢星期日的上午可以跟隨她返教會，亦正因為小朋友和大人是分開上主日學和祟拜的，在她那裏補習的小朋友可以少對著她半天，可以說是如釋重負，至少我是這樣想。其他小朋友的父母如果是有空的，便可以在星期六請假一天，享受家庭樂。奈何我的父母根本抽不到空閒時間，所以對於我來說，在那時返教會則是一件十分興奮的事，因為可以唱歌，可以大笑，可以玩遊戲，沒有了平時緊張的讀書氣氛，而這短短的半天就是我童年時僅有的愉快回憶。

→之後隨著年紀長大，漸漸認識到神的兒子 — 耶穌在世時的作為，祂為到我們的罪，甘願被釘十架來赦免一切罪孽，完成救贖，給我們永生的應許。但我總是不明白為何導師總教導我們要仿傚耶穌的品格，而那些大人又總是做不到呢？補習老師如是，我的兩位姊姊亦如是。我的兩位姊姊同樣是基督徒但不是和我返同一間教會，她們自我小六沒有補習以來，便以半強迫半利誘的方法帶我返她們的教會，記得有一次我決意不返教會，寧在家看電視打電玩，但雙拳難敵四手，最終她們一個按住我不許我動，另一個就幫我穿鞋，我亦曾大呼小叫，但因嘈醒了姑姐，而受到責罵被迫就範。之後又隨著年紀長大，在初中階段跟隨姊姊參加教會的一個夏令營內，衝動地決了志信耶穌，但其實沒有根基的。當時我好像得到解脫似的，因為不用再被迫返教會，隨後我亦明白到「樹大有枯枝」的道理，可能是身旁沒有一位成熟的基督徒作榜樣吧！而我亦寧願去做那枯枝。自此我便沒有再返教會。

→其後在我中三那年，神奇妙的安排使我認識到一位長短腳的班主任 郭儉良老師，他是一位基督徒，他從不介意同學們取笑他長氣和長短腳，反而給予了我為人隨和、友善、謙遜及亦師亦友的感覺，亦碰巧當時我開始有興趣研讀一些如何作為君子的書和歷史書，開始想去成為一位君子和領袖。但江山易改本性難移，最終因生事被郭老師第一次召去談話。他問了我兩個問題，仍然瀝瀝在目。第一個問題在第一次對話中令我恍然大悟，他問：「你本性不壞的，為何要讓自己成為這樣的人呢？」自此我便常常找他聊天。而另一個問題是在我們討論如何才算是一名好領袖時，他問：「你認為一位好領袖的品格是偏向男性，抑或是偏向女性呢？」而當時我只遲疑了片刻便答：「偏向男性。」他的答案令我開始注意別人的感受，他回答道：「其實答案是在兩者之間。」因為男性化具決斷力，而女性化則會體會別人的感受，而兩者俱備就可作出一個大眾都支持的決定。當然這是一位好領袖需要俱備的一小部份。但這答案足以使當時毫不理會人感受的我轉變過來。但可惜的是，在我中五那年，郭老師因私人理由不能再在校教書，亦因為沒有聯絡，使我失去了一位良師。

→其後會考放榜，幸運地得到八科全部合格的成績，而亦自知不是讀書的材料，便選擇到母親的店舖幫手。其後因為窩福堂的傳道人仲明是我家茶餐廳的熟客，便開始認識他。而其後他更邀請我加入窩福籃球隊，但在那時我在隔鄰的麵包店打工，不能在星期日放假，故不能參加祟拜和團契，只能勉強參加球隊練習，幸好當時籃球隊友Ray約我到04年5月8日「珍惜眼前人」佈道會，雖然我在那一次的佈道會中，所得著的不多，但當講道牧師呼召時，我心裡想：「之前是我自己放棄了，而現在我又再有這樣的機會，給予我再決志，那麼我就再一次用行動去證明我是一個基督徒吧！我深信我一定可以堅持下去的。」於是我站起來並走到台前表示要再次跟從主，又願意打開我心門，接受耶穌為我救主和主宰，赦免我的罪，掌管我的一生。

→再決志後不久，我自問不想做一輩子的麵包師傅，反而想做警察、消防員等政府工作，但自覺達不到最低學歷要求，便開始詢問籃球隊友的意見，之後便選定了一間基督教私校，名叫神召會馬理信紀念中學，開始重返校園升讀中六。而在八月中的一次團契聚會當中，聽到仲明的一句說話改變了我對所有人的看法，「我們的信心不是放在任何人身上，而是放在神身上。」這句話絕對正確，其他人總會有使我們失望的時候，但神卻從來都沒有。「上帝是我們的避難所，是我們的力量，是我們在患難中隨時的幫助。所以，地雖改變，山雖搖動到海心……我們也不害怕。」﹝詩篇四十六篇1~2節﹞其後我看了一本書 標竿人生。書內記載了聖經一段經文「你們所受的試探，無非是人受得起的；上帝是信實的，衪必不容許你們受試探過於你們抵受得住的，而且在受試探的時候，必定給你們開一條出路，使你們能忍受得住。」﹝哥林多前書十章13節﹞這段經文給予了我很大的鼓舞，更成為了我往後遇到種種挑戰、引誘、挫敗時的座右銘。亦因為這本書，使我更加決意去仿傚基督的品格，活出基督在我生命裏的見證，帶領更多的人歸信主耶穌基督。我簡兆恆不願再做那「枯枝」了！我相信不是靠自己的能力，乃靠著祂所賜的新生命和能力，我必可以成為合神心意的基督徒。

→神在我身上一切一切奇妙的作為，是值得我全心獻上讚美和奉獻的，同樣地在你們各人身上都有著神奇妙的作為，因為「神愛世人，甚至將祂的獨生子賜給他們，叫一切信祂的，不至滅亡，反得永生。」﹝約翰福音三章16節﹞

→最後「但願我們主耶穌基督和那愛我們、開恩將永遠的安慰並美好的盼望賜給我們的父上帝，安慰你們的心，並且在一切善行善言上堅固你們。」﹝帖撤羅尼迦後書二章16~17節﹞願將一切的榮耀都歸於父上帝，阿們。

不可思議之生命價值再思

親愛的弟兄姊妹：

我只想和您分享一些不可思議的事情！
真不可思議？

一張一百元正的鈔票在教會奉獻時是多麼大的面額，
但在行街購物時卻是如此的細小？
真不可思議？

兩小時在教會過就好長，
但看一套電影就好短？
真不可思議？

當禱告時要找一個字都好難，
但與朋友傾談時卻口若懸河？
真不可思議？

有人覺得讀一章聖經又難又悶，
卻很容易地就看完百多頁的小說？
真不可思議？

人人都想在演唱會或在遊戲時坐在前排，
但在教會他們無論如何都會坐後排？
真不可思議？

我們要教會預先兩三個星期通知活動，
才能安放在自己的時間表裡，
但我們只需用兩三分鐘就安排好參加其他的活動？
真不可思議？

我們很困難才能從神學到真理與人分享，
卻好容易就學到講閒話，甚至謠言滿天飛？
真不可思議？

我們相信在報紙雜誌中講的每件事，
卻懷疑聖經裡所記載的事蹟？
真不可思議？

人人都想上天堂，
卻不願去了解和探索任何東西？
真不可思議？

我們常常將笑話從電郵傳來傳去，
但! 當我們要將神的信息傳給別人時，
卻一再考慮？
真不可思議？

最不可思議的是，這不可思議的神，
從未放棄過我們這些心硬得不可思議的人。

「我們都習慣迎合這個世界的價值觀，大部份人都欠缺活出自己的勇氣。」

我成日都用過馬路呢個例子告誡自己，
一個市民既立場，
成日都見到有人亂過馬路，當俾車嚇到或者係俾車"砵"既時候，
總係會聽見有人破口大罵，究竟晌鬧人之前，佢地有無諗過係自己既錯呢？
點解個駕駛者就要守法，唔只要讓埋你過馬路，仲要俾你惡人先告狀？
難道在車內的就要守法，在車外的就可以違法！？
車內車外既唔係都係普通市民咩？
難道在車內的人比較文明，懂得何謂法律，明白需要守法？
真不可思議？

一個基督徒既立場，
聖經記載，我地除左要守上帝既律法，更要守地上既律法。
我守法，唔亂過馬路，
唔係我驚俾人捉到要罰800蚊，
唔係我自命清高，做一個守法既人，想去睇低其他人，
我守法只係基於三個原因：
第一，我明白到唔好以為你做既野，無人睇到就無事無錯，
唔好忘記上帝晌到睇住我地每一個人既一舉一動。
第二，我希望做神所喜悅既事，守法只係其中一樣。
第三，由我決志個刻開始，
主耶穌基督已經住係我心裏面，
已經係我生命既主宰，
我既身體已經成為基督既殿，
試問耶穌會唔會犯法呢？
雖然到目前為止我只係做到百分之八十係依照交通燈指示過馬路，
但係我深信只要靠著 神所加給我既力量，終有一日我係可以做到百分百既！

無題

大家姐...我都想黎...
但係我無假鴉嘛...
鬼叫小童群益會係合約制...仲要係四月簽約咩...
我有咩計姐...
下次啦...有機會既話...
原來阿爸阿媽同埋二家姐星期六朝早機喎！
聽晚開始過單身漢既生活喇...

Jesus Loves You

如果你做左以上既禱告，記住記住一定要話俾我知呀！
因為我係一名基督徒！

無題

仲有兩日，阿爸、阿媽同埋二家姐就會飛去美國探大家姐...
因為大家姐佢就生得喇！！真係恭喜晒呀！
而我亦都將會做人舅父...
今年真係好事接踵而至呀...
首先係我二家姐結婚喇！(日子未定)
跟住係Leo結婚！(日子唔記得)
仲有係阿Ray11月1日結婚！
真係恭喜晒呀！
不過黎緊個兩個星期我就慘喇...
得番一個人晌屋企...
點過呀......

仰光短宣第一回

18/03/2008短宣第一日
第一次自己一個出門唔係去留學、唔係去旅行，而係去短宣，難忘的第一次。
有人問我：「放大假會去邊呀？」
我答：「緬甸」
「去個到做咩呀？」「短宣。」
「咩話？」「好似宣教咁。」換來一陣笑聲......
之後佢地問咩都已經唔係重點，話不投機半句多......
佢地越係咁樣，我就越覺得可以去到短宣，係我既榮幸！
記得17號個晚要好夜先收得工，團契既弟兄姊妹想同我晌出發前食餐飯都唔得...唔好意思！
我仲要係當晚先執野，好彩無執漏野，真係神既保守呀！
之後去到機場，由過關到緬甸仰光，雖然中途俾人檢查過行李，但係我都唔緊張。
都係個句啦！「我知道我只要緊靠住上帝，任何事情都可以迎刃而解！」

到仰光個陣，竟然有一袋物資唔見左喎，等極都無，我地唯有返左酒店先。
我地一行人分開兩部的士返酒店，當我先到酒店個陣，有個職員走過黎同我講佢係基督徒。
我感到驚訝！因為竟然有人主動同人講自己係基督徒，從佢身上我感受到咩叫「不以福音為恥！」
試問自己真係唔夠膽主動同一個陌生既外國人講「我係基督徒！」
之後等齊人check埋in，就要即刻換夏天衫，出去買物資，我地就即刻搵個幾袋物資，因為我地既衫都寄晒倉。
但係神再一次既保守，唔見左既個袋物資係無我地既衫架！

到夜晚我要一個人去機場領返袋物資，到呢一刻我就驚喇！
我唔係驚佢地會檢查行李，我係驚我要用英文講野呀！
點知真係出事，佢問我袋野裝咩，我答佢係裝個人衣物，食物(用英文答)...
我竟然口震，個個人都半信半疑，要打開睇下，心諗大獲！
好彩佢淨係開左個塑膠杯黎睇。
好記得佢講左句：「it's very nice」
我個陣都一額汗，唔識應佢，淨係識笑。
真係有驚無險呀！

19/03/2008短宣第二日
梳洗完，食完早餐，Calza就帶住我地唱詩查經敬拜神。決志至今都未試過，晌朝早九點幾做敬拜。
敬拜完，感覺到成個人既精神好...唔識形容，總之就係feel so good啦！
去到Centre，第一樣要做既係...跳舞...=.="

↑咁大個仔都未試過晌眾人面前手舞足蹈...真係焗住上...仲要出左一身冷汗=.="
就係咁學識左兩首英文歌"Love of Jesus"同"This is the day that the Lord had made"加動作。

↑唱完歌就係講故事時間，晌講故事之前佢地會唱一首歌令到班小朋友安靜。

↑講緊既係耶穌被釘十架，三日後復活既歷史故事。
而且開始個陣會點一支蠟燭。唔知係用黎做咩既，無問到人點解。

↑講完故事就會有幾個小朋友出黎帶領大家祈禱。
雖然聽唔明，但係我覺得會係主禱文，因為個個小朋友都識，不過我無考證過係唔係。

↑祈完禱，就會有個小朋友出黎整熄支蠟燭。

↑跟住係教生字時間，教緊既係顏色英文生字。

↑終於到我地短宣隊出場喇！
相裏面已經係Calza講解緊畫公仔晌雞蛋到，之前已經由我地短宣隊既姊妹Venus講左故事。講既都係耶穌被釘十架，三日後復活既歷史故事。證據就係黑板上面既三個十字架，係我地畫上去既，但係點知用錯筆，擦唔甩。不過之後個日都俾我擦甩左。

↑香港短宣隊姊妹-Pat。

↑香港短宣隊姊妹-Venus，係我地既英文顧問兼攝影師。



↑大家望一望左手邊既同工，係咪覺得佢好似香港人或者係韓國人呢！
當我一行入Centre見到佢就覺得佢係香港人，加上佢著住件窩福堂既衫，令到我以為佢係晌窩福堂過黎呢到做宣教既，個一刻我打左個突，心諗「呢位姊妹應該同我差唔多大，咁犀非之利既！！」
但係原來佢係本地人，只係皮膚比較白。

↑雞蛋就畫完喇！
↓又係時候到我出場喇！今次我負責將所有雞蛋同埋糖收埋晌個中心外圍。

↓之後就梗係等班小朋友搵返出黎啦！



最後點數個陣竟然有三隻蛋未搵得返！但係我已經放得好明顯，我搵晒成個中心都搵唔返。之後發現原來係有小朋友未將搵到既雞蛋同糖交出黎......
↓遊戲就玩完喇！Calza就將窩福帶過黎既勞作俾班小朋友睇。


↓晌呢個時候就係班同工幫小朋友準備午飯既時間。

開餐之前佢地都會祈禱同唱"Meal prayer"
↓開餐喇！但係同工仲未食得飯住。


↓因為同工要準備好地方俾小朋友午睡。

↓班小朋友好有紀律架！食完飯佢地會自己放返好個飯盒同飲水，最後係食糖。

(糖係佢地食飯食得怏既原動力！)
↓連糖都食埋就到午睡時間。食飽睡一睡，好過做元帥！

呢個時間先至係同工食飯既時間，有樣野講左你都未必信，Centre既同工逢一三五都會加(食送)。
加咩(食送)呢？當日有7樣(食送)，我地加左其中四樣。
一碟煎烚蛋、一罐豆豉鯪魚同埋兩個杯麵。
而佢地本身個三樣(食送)係：一碟菜、一碟咖哩豬肉薯仔(當日好少少有肉，平時真係得薯仔)，最後係一碗仔既自製辣椒醬汁。
最深印象係我無諗過杯麵都可以做(食送)，其次既就係個碗自製既辣椒醬汁，(簡 簡 勒)，好味到可以令我添飯，因為個款醬汁辣得黎好醒胃。
食完飯之後，到班小朋友起身，佢地真係好聽話，叫佢地起身除左唔喊，仲識得放返好個枕頭。(唔好忘記佢地只得3歲)
放學個陣一人獎左一包薯條、幾粒糖同埋派返隻雞蛋俾佢地。
↓咁就一DAY喇~~